ආසියාවේ උසම හිටි බුදු පිළිමයට මුල්ගල තැබීමේ උත්සවය
විල්සන් විඡේරත්න - ඉත්තෑපාන
ඕනෑම රටක ධනපතියන් අතුරින්, දානපතියන් වන්නේ සුළු පිරිසක්‌ බවත්, තම පෞද්ගලික ධනයෙන් විශාල මුදල් ප්‍රමාණයක්‌ වැය කරමින් ආසියාවේ උසම හිටි බුදු පිළිම වහන්සේ ඉදිකර රටට සුවිශාල සේවයක්‌ සිදු කිරීමට බලාපොරොත්තු වන ජගත් පින්නගොඩවිතාන මහතා ද එවැනි දුර්ලභ ගනයේ දානපතියෙක්‌ යෑයිද, හිටපු ජනාධිපති චන්ද්‍රිකා කුමාරතුංග මහත්මිය ප්‍රකාශ කළාය.
ඒ මහත්මිය එසේ සඳහන් කළේ ජගත් පින්නගොඩවිතාන පදනමේ පූර්ණ දායකත්වයෙන් හා බටමුල්ල කන්ද විහාරාධිපති මතුගම මහානාම හිමිපාණන්ගේ අනුශාසකත්වයෙන්, මතුගම බටමුල්ලකන්ද බෞද්ධ මධ්‍යස්‌ථාන කඳු මුදුනේ රු. ලක්‍ෂ 900 ක වියදමින් ඉදිකිරීමට සැලසුම් කර ඇති අඩි 135 ක්‌ උස අවුකන බුදුපිළිම වහන්සේගේ අනුරුව වෙනුවෙන් මුල්ගල තැබීමෙන් අනතුරුව පැවැති උත්සව සභාවේදීය.
කෝට්‌ටේ නාග විහාරාධිපති අතිපූජ්‍ය මාදුළුවාවේ සෝභිත හිමිපාණන් මෙම උත්සව සභාවේ මුලසුන හෙබවූහ.
මතුගම ශාසනාරක්‍ෂක බල මණ්‌ඩලයේ හිටපු සභාපති හා දක්‍ෂිණ ලංකාවේ ප්‍රධාන සංඝනායක රන්දොඹේ සුමනාලෝක හිමිපාණන් පිරිස පංචශීලයෙහි පිහිටුවූහ.
මතුගම ශාසනාරක්‍ෂක බල මණ්‌ඩලයේ සභාපති හා කැකුලන්දල පතිරාජ පරිවේනාධිපති යටදොළවත්තේ චන්ද්‍රසිරි හිමිපාණන් මෙහිදී විශේෂ අනුශාසනාවක්‌ සිදු කළහ.
එහිදී තවදුරටත් අදහස්‌ දක්‌වමින් හිටපු ජනාධිපතිනිය මෙසේද කීවාය.
මෙවැනි පුණ්‍යකර්මයක්‌ සිදුකිරීම තුළින් බෞද්ධයන්ගේ ආගමික ප්‍රබෝධය වැඩි වීමටද හේතු වෙනවා.
එමෙන්ම කලාවන් අතුරින් ප්‍රතිමා නිර්මාණය කිරීම ඉතාම දුෂ්කර කාර්යයක්‌ යෑයිද නිවැරැදි නොවන අන්දමින් ඉදිකර ඇති සමහර ජාතික නායකයන්ගේ ප්‍රතිමා දැකීමෙන් එය පැහැදිලි වන බවද ඇය කීවාය.
එමෙන්ම මා මෙම ස්‌ථානයට පැමිණියේ දේශපාලනඥයකු ලෙසින් නොවේ. ඒ නිසා දේශපාලනය ගැන මා මෙහිදී කථා කරන්නේ නැහැ.
ශ්‍රී ලංකාව සිංහල, බෞද්ධයන්ට අයිති බවට සමහර නායකයන් හැඳින්වුවත් එහි කිසිම සත්‍යතාවක්‌ නැහැ. එබැවින් සිංහල මුස්‌ලිම්, දෙමළ ආදී විවිධ ජාතීන් සමගියෙන් හා සමාදානයෙන් ජීවත්වීමට කටයුතු කළ යුතුයි.
එබැවින් ජනතාව සතු යුතුකම් හා වගකීම් නිසියාකාරව ඉටු කර ජාති, ආගම් හා කුළ භේදවලින් තොරව සමගියෙන් ජීවත්වීමට අධිෂ්ඨාන කරගත යුතු යෑයි චන්ද්‍රිකා කුමාරතුංග මහත්මිය පැවසුවාය.
ශ්‍රී ලංකා ජපන් මිත්‍රත්ව පදනමේ අධ්‍යක්‍ෂ පැල්පොල විපස්‌සිS, මාදුළුවාවේ සෝභිත යන හිමිවරුන්ද මෙහිදී අනුශාසනා පැවැත්වූ අතර, පාර්ලිමේන්තු මන්ත්‍රීවරුන් වන අර්ජුන රණතුංග, අජිත් පෙරේරා, පළාත් සභා මන්ත්‍රී කිත්සිරි කහටපිටිය, මතුගම ප්‍රාදේශීය සභාවේ සභාපති එල්. ජී. ලියනාරච්චි යන මහත්වරු ද මෙහිදී අදහස්‌ දැක්‌වූ අතර, දොඩන්ගොඩ ප්‍රාදේශීය සභාවේ සභාපති කීර්ති පෙරේරා, මතුගම ප්‍රාදේශීය ලේකම් මහේෂිකා ද සිල්වා යන මහත්ම මහත්මීන් ඇතුළු ගිහි පැවිදි විශාල පිරිසක්‌ මෙම අවස්‌ථාවට එක්‌ව සිටියහ.
චන්ද්‍රිකා බණ්‌ඩාරනායක මහත්මිය සභාව අමතන අයුරු හා දානපති ජගත් පින්නගොඩ මහතා ඇතුළු පිරිස හිටි පිළිමයට මුල්ගල තැබීමට සූදානම් වන අයුරු
ඡායාරූප - විල්සන් විඡේරත්න ඉත්තෑපාන
Divaina.com
Posted in: 
.jpg)
.jpg)
.jpg)
0 comments:
Post a Comment