බොදු බල සේනාව ප්‍රශ්න කරන බෞද්ධයන්

භික්ෂු කිරම විමලජෝති සහ දිලන්ත විතානගේ මහතාට යොමු කල විවෘත ලිපියක් ‘බොදු බල සේනාව ප්‍රශ්න කරන බෞද්ධයන්’ යන නමින් පවත්වාගෙන යන මුහුණු පොත් පිටුවේපලවිය. මෙය එම ලිපියේ සිංහල පරිවර්තනයයි.

ගරු කටයුතු මහතුනි,

ඔබ තුමන්ලා පිළිගන්නන්, ඔබ තුමන්ලා ප්‍රතික්ෂේප කරන්නන් සහ ඔබ තුමන්ලා ප්‍රශ්න කරන්නන් සිටිනු ඇති බව ඔබලා විසින් පිලිගෙන ඇත. එනමුත්, ඔබලාගේ කතාව සහ ක්‍රියා කලාපය ප්‍රශ්න කරන්නන් සතුරන් ලෙස හුවා දැක්වීමට බෞද්ධ ඔබ ඉක්මන් වී ඇත. ප්‍රශ්න කරන්නන් සිංහල-බෞද්ධයන් නම් ඔවුන්ව ද්‍රෝහීන් ලෙස ඔබලා නම් කරති. බුදු දහමේ සැබෑ ඉගෙන්වීම් පිළිපදින, මෙත්තා-ක්ෂාන්ති වැනි බුදු දහමේ හරයන් ක්‍රියාවට නගන පුදගලයන් ඔබගේ සංවිධානය තුල සිටිත්වා ලෙස අප ප්‍රර්ථනා කරන අතර සිය වැරදි පිළිගෙන තමන්ගේ ක්‍රියාකලාපය නිවැරදි කර ගැනීමේ හැකියාව ඔබට ඇතැයි සිතමු.

අද බුරුමයේ සිදුවන දෑ දකිමු. බුරුමය තුල සිදුවන ප්‍රචණ්ඩකාරිත්වයට මග පෑදු සාධක අද ලංකාවේද දක්නට ලැබෙන බව ඔබ තුමන්ලාට වුව පෙනී යනු ඇත. එම සාධක නම් මෙසේය:

1. සමාජයේ සහ අන්තර්ජාලයේ ප්‍රසිද්ධියේම ඉස්ලාම් දහම අදහන්නන්ව අසාධාරණ ලෙස විවේචනය කිරීම

2. මුස්ලිම් කඩ වලින් භාණ්ඩ නොගන්නා ලෙස බෞද්ධයන්ට දැන්වීම

3. බෞද්ධයන්ට මුස්ලිම් ව්‍යාපාර වර්ජනය කිරීමට බලපෑම් කිරීම්

4. මුසල්මානුවන් සමග නෑකම් ඇති බෞද්ධයන් හැල්ලු කිරීම

5. මුස්ලිම් වෙළද ස්ථාන සහ පල්ලි වලට පහර එල්ල කිරීම

6. මේ අසාධාරණයන්ට එරෙහිව කතා කරන්නන්ට පහර ගැසීම

ගරු කටයුතු මහතුනි, ප්‍රචණ්ඩකාරිත්වයට මග පාදන මේ සාධක අප පනස් ගණන්

වල සහ අසූව දශකයේ දුටුවෙමු. බෞද්ධ නායකයන් නිසි සෝදිසියෙන් කටයුතු නොකළහොත් නොබෝ කලකින්ම ලංකාවේ නැවතත් දීර්ඝ කාලීන ජනවාර්ගික අරගලයක් ඇති වනු ඇත. අහිංසක ජීවිත දහස් ගනනක් විනාශ වීම හැරුන විට එයින් ලංකාවට සහ බුද්ධාගමට කැළලක්ද වනු ඇත.

ඔබ තුමන්ලා කිසිදු ප්‍රචණ්ඩකාරී කටයුත්තකට සහබාගි නොවන බව පැවසුවත්, එම ප්‍රචණ්ඩ ක්‍රියාවන් සිදුවූයේ ඔබ සංවිධානයේ සාමාජිකයන් විසින්, පහසුවෙන් පෙළඹවිය හැකි සිංහල යෞව්වනයන් අතර ඉදිරිපත් කල ජාතිවාදය ඇවිලෙන කතාවන් නිසා බව පෙනී යයි. සිංහල යෞව්වනයන් නැඟුටුවීම සඳහා ඔබලා භාවිතා කරන්නේ බුද්ධියට ආමන්ත්‍රනය කිරීම හෝ, මෙත්තා, කරුණා, මුදිතා, උපේක්ෂා වැනි බුදුන්ගේ ඉගැන්වීම් හෝ නොවේ. ඒ සඳහා ඔබලා උපයෝගී කරගෙන ඇත්තේ සිංහලයන් සමග වසර දහස් ගණනක් ජීවත් වූ, වෙහෙස වූ, දිවි දුන් සුළු ජාතියක් සතුරන් ලෙස හුවා දක්වීමෙන්ය. කතාකිරීමේ අයිතිය ඇති බව සැබෑය. නමුත් එම කතාව සුළු ජාතියකට බරක් වීම වැරදිය. ලංකාව තුල මුස්ලිම් අන්තවාදී කොටස් ඇති බව සැබෑය. නමුත් එම ප්‍රශ්නය විසඳීම සඳහා බුදුන් පෙන්වාදුන් මාර්ගය වෙනස්ය.

මහත්වරුනි, මෑත කාලයේ සිදුවූ සියලු ප්‍රචණ්ඩ ක්‍රියා සිදු වුයේ ඔබ සංවිධානයේ භික්ෂූන් කල කතාවක් පදනම් කරගෙනය. මෙම කරුණින් ගම්‍ය වන්නේ ප්‍රචණ්ඩ ක්‍රියා ඇති වීමට හේතු සාධකය වන්නේ ඔබ සංවිධානයේ භික්ෂූන්ගේ ද්වේෂ ජනක කතාව බවයි.

ඔබ තුමන්ලා මහනුවරදී කල කතාවෙන්ද මේ බව ගම්‍ය වේ. “සිංහල ජනතාව එක්සත් කලේ හලාල්” බව එහිදී ඔබලා ප්‍රකාශ කල අතර, ඇතැම් සිංහල තරුණයන් මුහුණු පොතේ කරන කාර්තව්‍යයන් ගැනද ඔබලා පැසසුමට ලක් කලෝය. නමුත් ඔබලාට සහය දක්වන්නාවූ

මුහුණු පොතේ පිටු තුල තිබෙන්නේ ධර්මය හෝ බෞද්ධ සංස්කෘතිය නොව මුස්ලිම් විරෝධයයි. ඔබආට සහය දක්වන, සිංහලයන් දහසකගේ “Like” ලැබුන, මුහුණු පොතේ තිබෙන “සිංහල බෞද්ධයා (Sinhala Buddhist)” සහ ” ශ්‍රී ලංකා ජාත්‍යන්තර බෞද්ධ කවුන්සිලය(International Council Buddhists Sri Lanka)” වැනි පිටු මෙයට උදාහරණයන්ය. එම පිටු වල ප්‍රතිචාර මුස්ලිම්-විරෝධී ද්වේශයෙන් සහ නින්දිත වචන වලින් පිරී තිබේ.

බෞද්ධයෙකුට දානය කල හැකි උතුම්ම දානයන්ගෙන් එකකි අභය දානය. එනම් සතුරු උපද්‍රව යනාදී බියෙන් නිදහස් කිරීම. මෛත්‍රියෙන් අර්ථවත් වූ පංච සීලය බෞද්ධයන් රකින්නේ මෙනිසයි. නමුත් ඔබලාගේ සංවිධානය දැන් කරන්නේ එම හරයන් පසෙකලා බුද්ධාගම විකෘති කිරීමයි. ඔබ මෙය වටහාගෙන නැතිනම් මොහොතක් මේ ගැන මෙනෙහි කරනමෙන් ඉල්ලා සිටිමු.

සියලු දේ අනිත්‍යයි. එය ‘සිංහල’ යන්නටද අදාලය. සංසාරයෙන් එතෙර විය හැක්කේ සෝවාන් වූවන් හට පමණයි. මිනිසුන් ධර්මයේ සරණ යන්නේ සංසාරයෙන් මිදීමටය. මිනිසුම් හට එම ධර්මය උගන්වන්න. අපාගත වීමට හේතු වන වෛරයෙන් ඔවුන්ගේ සිත් නොකෙලසන්න. ඔබ එසේ කරන තුරු අපි බෞද්ධයන් ලෙස, සිංහල-බෞද්ධයන් ලෙස ඔබලාව ප්‍රශ්න කරන්නෙමු. එසේම මෙම මුහුණු පත් පිටුව වසා දැමිය හැකි දිනයක් බලාපොරොත්තු වන්නෙමු.

-බොදු බල සේනාව ප්‍රශ්න කරන බෞද්ධයන්

Posted in: ඉස්ලාමයේ විරෝධීන්,බොරු නොකියනු,සමගිය සහජීවනය සහයෝගය සාමය