හරාම් හරාම් මත්ද්‍රව්‍ය හරාම්!!!

අද දින කොටුව දුම්රියපොළ ඉදිරිපිට රැව්දුන් හඬයි ඒ. හරාම් යනු ඉස්ලාම් ධර්මයට අනුව තහනම් දේ හඳුන්වන පොදු නාමයයි. බොහෝ විට කොටුව දුම්රිය පොළ ඉදරිපිට අප දැක්කේ ජේ වී පෙ සාමාජිකයින් හෝ විශ්වවිද්‍යාල සිසුන්ගේ උද්ඝෝෂණ හෝ විරෝධතා ව්‍යාපාරයන්ය. නමුත් අද එයට හාත්පසින්ම වෙනස් සටන් පාටයක් සහිත පුවරු දක්නට ලැබිණි. එනම් 

එපා එපා මත්ද්‍රව්‍ය එපා !! හරාම් හරාම් මත්ද්‍රව්‍ය හරාම්!!!!

මෙහිදී අදහස් දැක්වූ කොළඹ දිස්ත්‍රික්ක මස්ජිඩ් සම්මේලනයේ ලේකම් තුමා පැවසුවේ අද හරාම් යන වචනයට නව ගැම්මක් ලැබුණු බවයි. හේතුව මෙයට පෙර හලාල් යන වචනය මුල් කරගෙන රටේ නොයෙකුත් මති මතාන්තර පැතිර ගිය අතර සමහරු එයට වැරදි අර්ථ කථනයන් දී දේශපාලන වාසි ලබාගැනීමට උත්සහ දැරුහ. අවසානයේදී ඔවුන් සියල්ල අන්ත පරාජයට පත්වුහ.

කොළඹ මුස්ලිම් පල්ලි සම්මේලනය, මුස්ලිම් තරුණ සමිතිය හා අන්තරා දායක ඖෂධ වැළැක්වීමේ ආයතනය

එක්ව මෙය සංවිධානය කර ඇති අතර මේ සඳහා කොළඹ මුස්ලිම් දේවස්ථාන 168ක් හා අනෙකුත් ආගමික දේවස්ථානයන්හි සහභාගීත්වයෙන් ඉතා සාමකාමිව සවස 5.30 නිමා විය.

මෙහි ප්‍රධාන ප්‍රශ්නය වන්නේ 
යහ පාලනය විසින් මෙම මත්ද්‍රවය ව්‍යාපාරය යම් මට්ටමකට හෝ පාලනය කරයිද යන්නයි.

Read more »

Posted in: ප්‍රවේසම්වන්න.,භීෂණය,සමගිය සහජීවනය සහයෝගය සාමය

‘‘හිත ඇත්නම් පත කුඩා නොවේ‘‘

2014 සැප්තැම්බර් මස 02 14:21:15 | කෝවිද ගුණසේකර

ක්ලෝඩියෝගේ හිස ඇත්තේ උඩ යට මාරුවී සිරුරේ පිටුපසට හැරී ඇති අයුරිනි. අත් පා ඉතා කුඩාය.සෙලවීම අපහසුය.සිරුරද කුඩා දරුවෙකුගේ මෙන්ය. අත් පා හා හිස සිරුරට ඇලී ඇත.

සාමාන්‍ය මිනිසෙකු මෙසේ පෙනුමින් යුක්තවී නම් ඔහු ජීවිතය ගැන සියලූ බලාපොරොත්තු අත්හැර ගනු ඇත. නමුත් ක්ලෝඩියෝ එවැන්නෙකු නොවේ.

ආර්ථීක විද්‍යා උපාධිධාරියෙකු වන හෙතෙම සැලකිය යුතු වැටුපකට හිමිකම් කියන්නේය. තම නිදහස් කාලය ඔහු ගතකරන්නේ අනෙක් අයට ධනාත්මක චින්තනය සම්බන්ධයෙන් දේශන පවත්වමිනි.

‘‘උපත ලැබුවහම ඔක්කොම අය මගේ අම්මට කියලා තිබුණේ මට කන්න දෙන්නේ නැතුව තියන්න කියලා.‘‘ ක්ලෝඩියෝ තම අතීතය සිහිපත් කරන්නේය.

නමුත් ඔහුගේ මව වන මාරියා ජොසේ වෙයිරා ඒ කිසිවකට කන් නුදුන්නාය. හැකි සේ දරුවා හදා වඩා ගැනීමට ඉටා ගත්තාය.

‘‘මුල් කාලයේ අමාරු වුණා තමයි. නමුත් පස්සේ ඔක්කොම හරි ගියා. දැන් මගේ පුතා ඉන්න තැන බලන්න. මට හරිම ආඩම්බරයි ඔහු ගැන‘‘ ඇය කියන්නීය.

ක්ලෝඩියෝ ලියන්නේ තම මුඛයේ සිරකරගන්නා පෑනකිනි. ඔහුට පරිගණකය, ජංගම දුරකථනය පවා භාවිතා කිරීමට හැකිය. ඇතැම් අවස්ථාවලදී තම පවුලේ සාමාජිකයින් සමග ඔහු ඇවිදීමටද යන්නේය.

මුලින් පාසල් නොයැවීමට සිතා සිටියද ක්ලෝඩියෝගේ ඇවිටිලි නිසා අවසානයේ ඔහු පාසැල් යැවීමට මාරියා කටයුතු කර තිබෙන්නීය. ගුරුවරුන්ගේ සිත් දිනාගෙන පැමිණි ගමන ක්ලෝඩියෝ අවසන් කර ඇත්තේ විශ්වවිද්‍යාලයටද ඇතුළුවී ආර්ථීක විද්‍යා උපාධියක්ද හිමිකර ගැනීමෙන් පසුවය.

වෙන අය තමන්ට කිසිදා ලබා ගත නොහැකියැයි කියූ සියලූදේ හිමිකරගෙන තමන් දැන් ගත කරන්නේ සැපවත් දිවියක් යැයි ක්ලෝඩියෝ පවසයි‍.

‘‘මම වෙනස් තමයි. ඒත් මම ඒක මගේ ගමනට බාධාවක් කරගත්තේ නැහැ. දැන් මම කොහෙත්ම මම අනෙක් පුද්ගලයින්ට වඩා වෙනස් කෙනෙක් විදිහට දකින්නේ නැහැ. මමත් සාමාන්‍ය කෙනෙක්‘‘ඔහු තමන් ගැනම උපන් අභිමානයෙන් කියයි.

ක්ලෝඩියෝගේ මෙම තත්ත්වය අස්ථී නිසි පරිදි වර්ධනය නොවීම නිසා හටගෙන ඇති විකෘතිතාවයක් ලෙස වෛද්‍යවරු හදුන්වයි. වෛද්‍ය විද්‍යාවේ මෙම තත්ත්වය හදුන්වනු ලබන්නේ ‘‘ආර්ත්රෝග්‍රයිපොසිස් ‘‘ලෙසය.

අත පය සතර හොදින් ඇතද අනුනට අත පාන,දුක් කම්කොටලූ මැද තැවි තැවී සිටිනවා විනා නැගිට ඉදිරියට යෑමට වෙර නොදරන අය හට  දුක් කරදර මැද ජීවිතය ජයගෙන ඇති ක්ලෝඩියෝ කදිම ආදර්ශයකි.

Read more »

Posted in: අඳුරෙන් ආලෝකයට,ජනවහර,සමගිය සහජීවනය සහයෝගය සාමය

පළමුව මවුබිම - දෙවනුව ජාතිය අත්වැල් බැඳ ගනිමු

දයාබර බොදු බල සේනා සභිකයිනි

මදක් නවතින්න. සන්සුන් වන්න. ඔබ ඔබගේ යන ගමන ගැන නැවතත් මදක් සිතන්න. 

ඔබට අවශ්‍ය මුස්ලිම්වරුන් සමග යුද්ධයක්ද ?

එසේ නොමැතිනම් ඔබගේ රටේ ඔබගේ ජාතික අනන්‍යතා ආරක්ෂාකර ගනිමින් සාමකාමීව ජීවත් වීමටද ?

ඔබ අනුරාධපුර මුස්ලිම් සොහොන් බිම් කඩා ඉවත් කළ විට අප ඒ වෙනුවෙන් උද්ගෝෂණය නොකළෙමු 

ඔබ දඹුල්ල පල්ලිය කඩා සුනු විසුනු කර අනවසර ඉදිකිරීම් ලෙස කීවිට, අපද පල්ලිය එම ස්ථානයෙන් ඉවත් කිරීමට සහයෝගය දුනිමු

ඔබ හලාල් එපා කියූ විට අප හලාල් නැවැත්වූවෙමු.  අපනයන කරුවන්ගේ ඉල්ලීම මත පමණක් අපනයන භෝග පිටරට යැවීමට පමණක් දැන් හලාල් නිකුත්වෙමින් පවතී. ඔබට එයත් අවශ්‍ය නම් කියන්න එයත් නවත්වන්නම්

ඔබ කූරගල ඉල්ලුවිට පල්ලිය පමණක් ඉතිරි වන ලෙස තබා 90% ප්‍රමාණයක් භූමිය ඔබ වෙත නීත්‍යානුකූලව ලබා දීමට කටයුතු කළෙමු.

ඔබ මුහුණු සම්පූර්නයෙන් වසා ගෙන බුර්කා සඳහා විරෝදය දැක්වූ විට අප ඔබට අවනතව මුහුණ විවෘතව ඇඳුම් ඇඳීමට අපගේ සහෝදරියන්ගෙන් ඉල්ලා සිටියෙමු

ඔබ රාමසාන් මාසයේ ශබ්දවාහිනී භාවිතා නොකරන ලෙස ඉල්ලන ලද කළ අප එයට අවනතව ශබ්ද වාහිනී භාවිතා නොකරන ලෙස අවධාරණයෙන් ඉල්ලා සිටිමු.

ඔබ නෝ ලිමිට්, ෆැෂන් බග්, මාවනැල්ල, අලුත්ගම සහ අනෙකුත් මුස්ලිම් ව්‍යාපාර විනාශ කරන විට අප ඔබ දෙස කරුණා මෛත්‍රී උපේක්ෂාවෙන් බලා සිටිමු

ඔබ දර්ගා නගරයේ නිවාස කඩ සාප්පු 184 ක් විනාශ කර කෝටි ගණනක දේපල හානි කළවිටද අප අපගේ ජනතාවගෙන් ඉල්ලා සිටි එකම දේ නැවතත් වසර ගණනාවකට ඇදෙන යුද්ධයකට හේතු පාදක වන ලෙස කටයුතු නොකරන ලෙසයි.

දයාබර මහතුනේ,

ඔබ මේ ගනු ලබන මග නිසා ශ්‍රී ලංකාව ලෝකයා හමුවේ අවමන් වෙමින් පවතී

ඔස්ට්‍රේලියාවෙන් ශ්‍රී ලංකාවට විදේශිකයින් පැමිණීම වෙනුවෙන් නව කොන්දේශි ඉදිරිපත් වුයේ ඔබලා නිසා 

යුරොපිය හවුල මෙරටට පැමිණෙන සියලුම විදේශිකයින් වෙනුවෙන් නව කොන්දේසි ඉදිරිපත් කලේද ඔබලා නිසා 

ඇමෙරිකාව ඇතුළු සියලුම රටවල් රාජත්‍රාන්ත්‍රික මට්ටමේන් අප්‍රසාදාත්මක නිල ප්‍රකාශ ඉදිරිපත් වුයේ ඔබලා නිසා

UNHCR එක්සත් ජාතික මානව හිමිකම් කවුන්සිලය නැවතත් නව මානව හිමිකම් ප්‍රකාශ නිකුත් කරන්න ගත්තේ ඔබ නිසා

CNN, BBC, NYTimes, TheNation, AlJazeera සහ ලොවේ සියලුම ප්‍රධාන පෙලේ මාද්‍ය ශ්‍රී ලංකාව අවමානයට ලක්වන ලෙස ප්‍රකාස නිකුත් කලේ ඔබලා නිසා

ලෝකයේ සිටින සියලුම මානව හිතවාදී සංවිධාන ශ්‍රී ලංකාවේ ආණ්ඩුව හෙලා දකින ප්‍රකාශ නිකුත් කලේ ඔබ නිසා 

කෙටින්ම කිවහොත් මේ රට අරාජික වෙමින් පවතින්නේ ඔබ නිසා 

හිතවතුනි, 

ඔබ ඇත්තටම මේ රටේ අනාගතය ගැන සිතනවාද ?

ශ්‍රී ලංකාව ලෝකයා හමුවේ අවමන්  කිරීමට ඔබ සැරසෙන්නේ රට ගැන ආදරකින්ද ?

ශ්‍රී ලංකාවේ ආර්ථිකය කඩා කප්පල් කිරීමට ඔබ ක්‍රියා කරන්නේ මතු පරපුරට ආදරයෙන්ද ?

ශ්‍රී ලකාවේ යුද්දයක් නැවතත් ගෙන ඒමට ඔබ උත්සාහ කරන්නේ වසර 27 ක් ඔබ අප සියලුම දෙනා ගෙවූ කරුමය මද නිසාද ?

ශ්‍රී ලංකාවේ ගොඩ නැගීම පසෙක තබා මේ රට අරාජික කිරීමට සැරසෙන්නේ ඔබ මේ රටට ඇති ආදරයක් නිසාද ??

ඔබට ගැටළු තිබෙන බව සැබෑය ඒ මේ ලොවේ කිසිවෙකුත් ගැටළු නොමැතිව නැති නිසාය.

ඔබගේ ගැටළු විසඳීමට ඇති එකම මග සාකච්චාවයි, සම්මුතියයි., එකගතාවයි. 

පටු අදහස් රටේ වපුරවා රට අරාජික නොකොට, ඔබගේ ගැටළු ප්‍රජාත්‍රන්තවාදීව ලබා ගැනීමට කටයුතු කරන්න

ඒ සඳහා අත්වැල් බැඳ ගැනීමට අප සූදානම් 

ඔබ සූදානම්ද ?

මෙයට

ඔබ සමග සැමදා එකට අත්වැල් බැඳගෙන සිටින ඔබේම සහෘද

අබ්දුල්ලාහ් 

-- 

පළමුව මවුබිම - දෙවනුව ජාතිය

අත්වැල් බැඳ ගනිමු 

Read more »

Posted in: ජාතික සමඟිය,බෞද්ධ,භීෂණය,සමගිය සහජීවනය සහයෝගය සාමය

හජ් වන්දනා ගමන - සාරාංශය - ප්‍රතිපලය සහ උගතයුතු කරුණු

හජ් යනු කුමක්ද?

අරාබි භාෂාවට අනුව හජ් යන වචනාර්ථයේ තේරුම වන්නේ,

පිවිතුරු ස්ථානයක් කරා ගමන් කිරීම යන්න වේ.

ඉස්ලාමයට අනුව, නියමිත කාලයට, මක්කා නගරයට ගොස්, වතාවත් ඉටු කිරීම යන්න වේ.

ඉස්ලාමයේ ප්‍රතිපත්ති පහ

1. ශහාදා : ශාක්ෂි දැරීම
2. සලාත් : දිනකට පස් වතාවක් නමස්කාර කිරීම.
3. සකාත් :දුගී බද්ද
4. අස්සව්ම් : උපවාසය
5. හජ් : වන්දනා ගමන

අවසන් ප්‍රතිපත්තිය වන හජ් වන්දනාව තුලින් උගතයුතු පාඩම් හා එහි සාරාංශය පහත දෙක්වේ.

ü හජ් නමදුමකි - මෙය විනෝද චාරිකාවක් හෝ නැරඹීම සඳහා යන ගානක් නොවේ. මේ සඳහා මානසික 

හා කායික පෙර සුදානමක් අවශ්‍යයි.

ü තම විශ්වාසය අලුතික්රීමේ සංදිස්ථානයකි. ඉස්ලාම්හී අනිත් ප්‍රතිපත්ති මෙන්ම මෙහිදීද දේව භක්තිය මුහම්මද්තුගේ  ජීවිතය ආදර්ශයට ගැනීම, කරුණාව දයාව, පරස්පර සහෝදරත්වය වැඩි දියුණුවීම, යහපත   අයහපතෙන් වෙන් කර හඳුනා ගැනීමේ ස්වකීය ඥානය ඇතිවීම හා පාපයන්ගෙන් තොර පරිසිදු බිලිඳෙක්  ලෙස තමන්ව සකස් වීම.

ü මෙය පුහුණු කඳවුරකි  - දේවබිය භක්තිය, විනීත භාවය, යහපත් චරිතය එකිනෙකා අතර පරස්පර සම්බධය වැඩි දියුණුවීම.

ü සහෝදරත්වයේ සංකේතය - සමානාත්මතාවය සහ සමගිය, එකම ගැහෙ පැතිර පවතින අතු මෙන් ලොව සියලුම දෙනා එකම පවුලේ දරුවන් මෙන් එකට සංවිධාන වීම.සමගියේ ශක්තිය වර්ධනය කිරීම.

ü මුස්ලිම්වරුන්ගේ වාර්ෂික සම්මේලනය. - කළු සුදු, දුප්පත් පොහොසත්, පදවි තරාතිරම්, ජාති කුල භේද හා විවිධ භාෂා කතාකරන සියලු දෙනා එකට එක්වී උත්කර්ෂව සැමරීම, අදහස් උදහස් මරුකරගනීම, 

ü ඔවුන් සියලුදෙනා එක මධ්‍යස්ත ස්ථානයක් වටා රොක්වී ශ්‍රේෂ්ඨ අරමුණක් කරා තම අවධානය යොමු කිරීම.

Read more »

Posted in: ඉස්ලාම් සහ මුස්ලිම්හු,ජාතික සමඟිය,සමගිය සහජීවනය සහයෝගය සාමය

ආගමට, සමාජයට ගරු කරන රටක්‌ නිර්මාණය කළ යුතුයි - ජනාධිපති මහින්ද රාජපක්‌ෂ

මාතලේ විශේෂ - නිමල් ගුණතිලක

සෑම පුද්ගලයකුටම නිදහසේ තම ආගම ඇදහීමේ පසුබිම තිබිය යුතු බවත්, ආගමට, සමාජයට ගරු කරන සමාජයක්‌ නිර්මාණය කළ යුතු බවත් ජනාධිපති මහින්ද රාජපක්‌ෂ මහතා පෙරේදා (21 දා) මාතලේ දී පැවසීය.

මාතලේ විහාර පාර, ශ්‍රී බෝධිමළු පුරාණ විහාරයේ අභිනවයෙන් ඉදිකළ චෛත්‍ය රාජයාණන්ගේ කොත නිරාවරණය කිරීමෙන් අනතුරුව පැවැති ආගමික උත්සවයේ දී මේ බව සඳහන් කළ ජනාධිපති රාජපක්‌ෂ මහතා, වෙසක්‌ දිනයේ දී දන්සල්, වෙසක්‌ තොරණ ප්‍රදර්ශනයට කිසිවකු තහංචි දමා නැතැයිද පැවසීය.

එහිදී තවදුරටත් අදහස්‌ දැක්‌වූ ජනාධිපතිවරයා මෙසේද කීය. වෙසක්‌ දිනවල පවත්වන දන්සල්වලට සහ වෙසක්‌ තොරණ බලන්න මමත් යනවා. බුදු දහම වෙනුවෙන් හැම දෙයක්‌ම කරන්නේ තවත් ආගමක්‌ හෝ ජාතියකට පීඩාවක්‌ ඇති නොවන අන්දමටයි.

පන්සලින් ගමක්‌ හදන්න, රටක්‌ හදන්න පුළුවන්. ගමේ පන්සල විහාරස්‌ථානය සංවර්ධනය කිරීම රජයේ වගකීමක්‌. වෙනත් ආගමික ස්‌ථාන සංවර්ධනය ද සිදු කරනවා. ඒ කරන්නේ වෙනත් ආගමක්‌ පීඩාවට පත් කරමින් හෝ වෛර කරලා නොවෙයි.

රජයක්‌ ලෙස මේ රටේ සියලුම ආගම්වලට, ජාතීන්වලට ගෞරවය කරනවා. මේ සියලුම ජාතීන්ගේ සහයෝගය ලැබුණ නිසා අපි ත්‍රස්‌තවාදය මේ රටෙන් තුරන් කළා. ත්‍රස්‌තවාදය තුරන් කිරීම සියලුම ජනතාවගේ අපේක්‍ෂාව වූ නිසා ඊට ජනතාවගේ සහයෝගය ලැබුණා.

දැයේ දරුවන්, අනාගත පරපුර සදාචාර ගුණගරුක පිරිසක්‌ ලෙස හදන්න අවශ්‍යයි. මේ සඳහා දෙමාපියන්ගේ, ගුරුවරුන්ගේ සහයෝගය අවශ්‍යයි. මේ රටේ යටිතල පහසුකම්, භෞතික සම්පත් සංවර්ධනය කළාට වැඩක්‌ නැහැ, සදාචාර දරුවන් පිරිසක්‌ නැති වුණොත්. පන්සලෙන් මේ සඳහා ලැබෙන දායකත්වය සමාජයට ශක්‌තියක්‌.

ශ්‍රී බෝධිමළු විහාරාධිපති සියම් මහා නිකායේ මාතලේ දිසාවේ ප්‍රධාන සංඝනායක කොස්‌ගොල්ලේ සීලරතන හිමිද මෙහිදී අදහස්‌ පළ කළහ.

මාතලේ දිසාවේ ප්‍රධාන සංඝනායක මහලකොටුවේ විමලධම්ම හිමි ඇතුළු මහා සංඝරත්නය, මධ්‍යම පළාතේ මහ ඇමැති සරත් ඒකනායක, ප්‍රවාහන නියෝජ්‍ය ඇමැති රෝහණ දිසානායක, උසස්‌ අධ්‍යාපන නියෝජ්‍ය ඇමැති නන්දිමිත්‍ර ඒකනායක, පාර්ලිමේන්තු මන්ත්‍රී නීතිඥ ලක්‍ෂ්මන් වසන්ත පෙරේරා, පාර්ලිමේන්තු මන්ත්‍රී වසන්ත අළුවිහාරේ, මාතලේ පුරපති හිල්මි කරීම් යන මහත්වරුද මේ අවස්‌ථාවට එක්‌වූහ.

http://www.divaina.com/2013/05/23/news18.html

Read more »

Posted in: සමගිය සහජීවනය සහයෝගය සාමය,සංස්කෘතිය

එක්ව නැගී සිටිමුද? බෙදී වෙන්වී වැනසෙමුද?

උන්මත්තක හිට්ලර් ගේ පිරිසිදු ආර්්‍ය ජාතියක් යන සංකල්පය නිසා මිය ගිය ප්‍රමාණය - මිලියන 70

ත්‍රස්තවාදී ප්‍රභාකරන්ගේ ඊලාම් යුද්ධය නිසා මිය ගිය ප්‍රමාණය - ලක්ෂ 1 - ලක්ෂ 1.5

බොදු බල සේනා ව්‍යාපෘතිය නිසා මිය ගිය යන්නට නියමිත ප්‍රමාණය - ??????????

නැවතත් රට සිවිල් යුද්ධයකට යන තුරු බලා සිටිමුද.....?

නැතිනම් අවුරුදු විසි පහක කෘර යුද්ධයෙන් ගලවාගත් මව්බිම අනාගත පරපුර වෙනුවෙන් සාමයෙන් හා සහජීවනයෙන් යුතු රටක් කරමුද?

තීරණය ඔබ අතේ.

සිතන්න.!

විසිපස් වසරක යුද්ධය අවසන් වී ඇති මේ තීරණාත්මක මොහොතේ ආගම් හෝ ජාතීන් වශයෙන් නොබෙදී

රට සංවර්ධනය කරන්නට වෙන කිසිම දිනක නොලැබෙන අවස්ථාවක් ලැබී තිබියදී, බෙදී වෙන්වී රට නැවතත් ආගමේ නාමයෙන් යුද්ධයකට තල්ලු කරනවාද? නැතිනම් තවත් එන්නට සිටින ගිනිය නොහැකි සං්‍යයාවක් වන අනාගත පරපුරු වලට සාමයෙන් ජීවත්විය හැකි එක්සත් ලංකාවක් බිහි කරනවාද?

තීරණය ඔබ අතේ.

එක්ව නැගී සිටිමුද? බෙදී වෙන්වී වැනසෙමුද?

උපුටා ගැනීම : http://beyondtlimit.blogspot.com/2013/05/blog-post_1174.html

Read more »

Posted in: සමගිය සහජීවනය සහයෝගය සාමය

විවිධත්වය තුළින් - එකමුතු බව අගය කළ බාකීර් මාකාර්

(හෙට දිනට යෙදෙන එතුමන්ගේ 96 වැනි ජන්ම දිනය නිමිත්තෙනි)

සිටියද ගල් ගෙයි වැදි
පණත් - නමත් යයි සිඳි
ඒ - පණ රට - දැයට දි
නම රැක ගනු නොවැරදි....

එම්. එල්. ද සිල්වා ගුරු මුහන්දිරම්තුමා විසින් රචිත "සිරිත් මල්දම" පද්‍ය සංග්‍රහයේ මෙලෙස විවරණය කරන අයුරෙන්ම සිය පණ දෙවෙනි කොට තම නම රැක ගැනීමට - තම නාමයට අගෞරව නොවන්නට සැමදා කටයුතු කළ දේශහිතෛෂී - දේශමාන්‍ය අල්හාඡ් - එම්. ඒ. බාකීර් මාකාර් ශ්‍රීමතාණන් ගැන මතකය අවදි කරන්නේ බැතියෙනි.

1990 වසරේ යම් දිනෙක බේරුවල මරදානේ ඉතා දැකුම්කළු පරිසරයක "සිල්ලි" නම් වූ ඉතා මනරම් දිය පොකුණක්‌ අසබඩ පිහිටි ශ්‍රී ලංකා පාර්ලිමේන්තුවේ හිටපු කථානායක - දකුණු පළාතේ හිටපු ආණ්‌ඩුකාර බාකීර් මාකාර් මැතිතුමන්ගේ ඒ සොඳුරු නිවස්‌නයට මා ගියේ එතුමන් හමුවන්නට නම් නොවේ.

එදා මා එක්‌සත් ජාතික පක්‍ෂයේ ශිෂ්‍ය ව්‍යාපාරය වූ එක්‌සත් සමාජවාදී ශිෂ්‍ය පෙරමුණේ බේරුවල කලාපයේ සභාපති ලෙස එ.ජා.ප. බේරුවල බල මණ්‌ඩල රැස්‌වීමට සහභාගි වූයේ එවකට බේරුවල සංවිධායකවරයා වූ හිටපු අමාත්‍ය අධිනීතිඥ ඉමිතියාස්‌ බාකීර් මාකාර් මහතාගේ ඉල්ලීමක්‌ අනුවය. එතුමන් ජනතාව සමග කුළුපගය. ලෙන්ගතුය. චතුර කථිකත්වය - හෙළ බස හැසිරවීම තුළ ඔහු අති දක්‍ෂයෙකි. බොදු පාසල් අතර අද්විතීය වූ කොළඹ ආනන්දයෙන් බිහිවූ ආනන්දනීය පුත්‍රයෙකි. නිතර ධම්මපදය උපුටා දක්‌වන එතුමන් බොහෝ දැහැමිව දිවි ගෙවීය.

මා එහි යන විට ඉතා ප්‍රියමනාප සිනහවකින් මුව සරසාගත් බාකීර් මාකාර් මැතිතුමන් පැරැණි හිත මිතුරන් කිහිපදෙනකු සමග සුහද කතාබහක යෙදී සිටිනු දිටිමි. මිනිසුන්ගේ තරාතිරම නොබලා ලෙන්ගතුවීමටත් ඔවුන්ට ගෞරව කිරීමටත් එතුමන් දැක්‌වූ අපරිමිත දක්‍ෂතාවය නිසාම ඉමිතියාස්‌ නම් වූ තරුණ - නවක මන්ත්‍රීවරයාට මුළු කළුතර දිස්‌ත්‍රික්‌කයම රිසි සේ සංවිධානය කරන්නට හැකි වූ බව මා පසුව තේරුම් ගතිමි. මේ කෘතහස්‌ත මානව හිතවාදී - ජනතා නායකයාණන්ගේ ප්‍රඥවන්ත වැඩපිළිවෙළ නිසා එය වඩාත් පහසු වූ බව මට සිතේ.

කිසිදු බේදයකින් තොරව ඕනෑම අයකු ඇසුරු කරන්නටත් ඇවැසි කල පිහිට වන්නටත් හිටපු කථානායකතුමන් ඉදිරිපත් වූයේ ප්‍රතිලාභ බලාපොරොත්තුවෙන් නම් නොවේ. කෘතවේදී ස්‌තුතිය පමණක්‌ මැදහත්ව ඉවසූ එතුමන් දුප්පත් - අසරණ මිනිසුන්ගේ නඩු - හබවලට නොමිලේ පෙනී සිටිමින් සමහර විටෙක ඔවුන්ගේ මඟ වියදම් ද, තම සාක්‌කුවෙන් දෙන්නේ යෑයි මාගේ පියා හද පිරි බැතියෙන් අප සමග පවසා ඇත්තේ වරක්‌ - දෙවරක්‌ නොවේ.

බේරුවල විවිධ ජාතීන් වෙසෙන මිශ්‍ර පරිසරයකි. මේ ජනතාවාදී උතුම් දේශපාලන චරිතය මිනිසුන්ගේ සිත දිනා ගැනීමට ඔවුන්ගේ සහයෝගය ලබාගැනීමට රුසියෙකි. බොහෝ දේශපාලනඥයන්ට වඩා එතුමන් ක්‍රියාශීලීය. එනමුත් විශ්මය ජනක කරුණ වන්නේ ශ්‍රී ලංකා පාර්ලිමේන්තුවේ කීර්තිමත් කථානායකවරයකු වූ එතුමා බොහෝ නිහඬ චරිතයකි. ඉතා විනයගරුකය. කතාබහ සෙමිනි. කාගේත් සිත නොරිදෙන කතාවකි. බොහෝ කල්පනාකාරීය. මිනිසුන්ගේ ඉරියව් ඉතා ඉක්‌මණින් ග්‍රහනය කරගැනීමට, වටහා ගැනීමට උපන් සමතෙකි.

එතුමන් ශ්‍රී ලාංකේය දේශපාලනයේ ඉතා නිරහංකාර, ඉතා ආදර්ශවත් එමෙන්ම ඉතා චරිතවත් පුද්ගලයන් කිහිපදෙනා අතරින් ප්‍රමුඛ අයෙකි.

මොනයම් හෝ දෙයකට දැඩි කෝපයෙන් පසුවන්නෙක්‌ සැනෙකින් මුදු මොළොක්‌ තත්ත්වයට පත් කිරීමට එතුමන්ට වැය වන්නේ හද තෙමන මුදු වචන කිහිපයකි.

මෙහිදී අතීත සිදුවීමක්‌ සිහිපත් කරනු කැමැත්තෙමි. බේරුවල ප්‍රාදේශීය ලේකම් කාර්යාලයේ අභිනව ගොඩනැඟිල්ල විවෘත කිරීමේ උත්සවයට මා ගියේ මාගේ පියා සමගිනි. එකල ඔහු බේරුවල නගරය ආශ්‍රිතව කටයුතු කළ ග්‍රාම නිලධාරිවරයෙකි. ආණ්‌ඩුවේ මැති ඇමැතින් සපිරි ඉතා උත්කර්ශවත් උළෙලකින් ගොඩනැඟිල්ල විවෘත කෙරෙන දිනට පෙරදින සුමධුර පිරිත් දෙසුමකි. මෙහි සංවිධායක කමිටුවේ සිටි මාගේ පියා බොහෝ වෙහෙසී කටයුතු කළ බව මට මතකය.

වේලාසනින්ම පැමිණි බාකීර් මාකාර් මහතා සෑම දෙයක්‌ම හොඳින් නිරීක්‍ෂණය කරනු දුටුවෙමි. සියල්ල නිවැරදිය. සියල්ල හොඳින් සිදුවේ. සංවිධායක කමිටුවේ බොහෝ දෙනා එතුමන් හඳුනන අයය. සියලු කටයුතු අකුරටම කෙරී ඇත. ඔහු සතුටෙන් ඉපිලෙයි. ඉතාම සුපිරිසිදුව අඳින පළඳින එතුමන්ගේ වැඩත් පිරිසිදුය. සිතත් පිරිසිදුය. ඒ එතුමන්ගේ හැටිය.

යුහුසුළුව වැඩවල යෙදෙන මා පියා ගැන එතුමන් වඩාත් පැහැදී ඇති සෙයකි. ළඟට කතාකොට යමක්‌ විමසනු මම දුටුවෙමි. අනේක වාරයක්‌ තුතිකොට දිරිමත් කළ බව පසුව දැනගතිමි. මා ද ඔහු අසලට ගියෙමි.

එතුමන්ගේ ප්‍රියමනාප මෙන්ම සෘජු රූපකාය හොඳින් දැනගත්තේ එදාය. මේ අපේ පාර්ලිමේන්තුව නම් වූ ප්‍රජාතන්ත්‍රවාදයේ රන් දෙවොලේ නායකයාය. අණ දෙන්නාය. මේ ගැන වැඩි වැටහීමක්‌ ඇති වූයේ පසු කලෙකය. ඒ වයසින් මුහුකුරා යන විටය.

අවාසනාවකට වත්මනෙහි මුස්‌ලිම් විරෝධයක්‌ ගැන තැනින් තැන කනින් කොනින් ඇසේ. එදා ප්‍රාදේශීය ලේකම් කාර්යාලයේ උත්සවය සංවිධාන කළේ පිරිත් දේශනය, සංඝගත දක්‍ෂිණාව සංවිධාන කළේ දන් පිරිනැමුවේ, උත්සවයේ වගකීම්වලින් වැඩි කොටසක්‌ ඉටු වූයේ මුස්‌ලිම් තරුණයන් අතිනි. ප්‍රධාන සංවිධායක සහ අණ දෙන්නා මුස්‌aලිම් ජාතිකයෙකි. ඒ අපේ හිටපු කථානායකතුමාය. ජාති බේදයත්, ආගම් බේදයත්, සිංහල මුස්‌ලිම්ය යන හැඟීමක්‌ හෝ කිසිදු බේදයක්‌, ආරවුලක්‌ ගැන වගක්‌වත් නැත. පසුව හෝ දැන ගන්නේ ද නැත. සාමයෙන්, සමගියෙන්, සහයෝගයෙන්, සහජීවනයෙන් සියලු කටයුතු සිදුවේ.

මේ මානව හිතවාදී ජනනායකයා සියලු ජාතීන් අතර සමගියේ, සහජීවනයේ ප්‍රතිමූර්තියක්‌ බඳුය. එතුමන් ගන්නේ නිවැරදි මගය. සිය පණ දෙවැනි කොට "බාකීර් මාකාර්" නම් වූ ඒ ස්‌වර්ණමය නාමය, සිය කීර්ති නාමය රැකගැනීමට එතුමා ප්‍රතිපත්තිගරුක දේශපාලනයක නියෑළිනි. අප සෑම දෙනාටම ආදර්ශවත්, ඉතා නිරහංකාර, එමෙන්ම බොහෝ ඇසූ පිරූ තැන් ඇති රටට - දැයට වැඩදායී සුන්දර මිනිසකු ලෙස දිවි ගෙවීය.

මුස්‌ලිම් ජාතිකයකු ලෙස ඉස්‌ලාම් භක්‌තිකයකු ලෙස ඉපිද බොදු, කිතුනු, ඉස්‌ලාම් මේ සෑම ජනතාවම උතුම් ලෙස සලකමින් තම සේවය නොපිරිහෙලා ඉටු කළ මේ වන්දනීය දේශපාලන චරිතය සහජීවනය ගුරු කොට ක්‍රියා කළ බව නොරහසකි. විවිධත්වය තුළින් එකමුතු බව අගය කළ සාමයේ, සමගියේ, සහජීවනයේ 'බාකීර් මාකාර්' නාමය සදා සමරන්නේ හද පිරි බැතියෙනි.

ප්‍රසන්න දේශප්‍රිය

Read more »

Posted in: ජාතික සමඟිය,සමගිය සහජීවනය සහයෝගය සාමය